தா.பேட்டை:
திருச்சி மாவட்டம் தா.பேட்டையை அடுத்த ஜெம்புநாதபுரத்தில் அகில இந்திய விவசாய தொழிலாளர் சங்கத்தின் சார்பில் சாலை மறியல் போராட்டம் நடைபெற்றது. போராட்டத்தை சங்கத்தின் மத்திய கமிட்டி உறுப்பினர் சந்திரன் தொடங்கி வைத்து பேசினார். மாவட்ட செயலாளர் பழனிசாமி, சங்க தலைவர் நல்லுசாமி, ஒன்றிய செயலாளர் காஜாமொய்தீன் ஆகியோர் கோரிக்கைகள் குறித்து பேசினர்.
இதையடுத்து மகாத்மா காந்தி தேசிய ஊரக 100 நாள் வேலை திட்டத்தை பழைய முறையில் செயல்படுத்த வேண்டும். அதில் பண்ணை குட்டை, கரைபோடுதல் என்று கூறி சம்பளத்தை குறைக்க கூடாது. செய்த வேலைக்கு சம்பளம் வழங்க வேண்டும். அனைத்து கிராமங்களுக்கும் போதிய அளவில் குடிநீர் வழங்க வேண்டும். பேரூர் அரசு பள்ளிக்கு ஆசிரியரை நியமனம் செய்ய வேண்டும். ரேஷன் கடைகளில் அனைத்து பொருட்களும் வழங்க வேண்டும் என்பன உள்ளிட்ட பல்வேறு கோரிக்கைகளை வலியுறுத்தி விவசாய தொழிலாளர்கள் துறையூர் - முசிறி சாலையில் அமர்ந்து மறியலில் ஈடுபட்டனர்.
இதில் முசிறி ஒன்றியத்தை சேர்ந்த பேரூர், குடித்தெரு, இடையப்பட்டி, முத்தையநல்லூர், சிந்தம்பட்டி, பாதக்கொட்டம், ராக்கம்பட்டி,
ஒத்தப்பட்டி, காத்தியான்பட்டி உள்ளிட்ட பல்வேறு கிராமங்களை சேர்ந்த விவசாய தொழிலாளர்கள் பங்கேற்றனர். அவர்கள் கோரிக்கைகளை நிறைவேற்றக்கோரி கோஷங்களை எழுப்பினர்.
இதையடுத்து அங்கு பாதுகாப்பு பணியில் ஈடுபட்டிருந்த போலீசார், சாலை மறியலில் ஈடுபட்ட 137 பெண்கள் உள்பட 165 பேரை கைது செய்தனர்.
